Para celebrar o mes da lingua no 2021 temos unha chea de plans que seguro que vos resultan de interese!
Durante todo o mes teredes a exposición CantáMOLA en galego na praza de Ourense de Pontevedra. Ademais de gozar e descubrir máis sobre a música en galego na actualidade, tedes a opción de descargala aquí e escoitar a dúas listaxes de reproducción en Spotify e YouTube.
Podedes participar no Cinefórum de Falamos, indo ás proxeccións e aos coloquios que se farán o xoves 13, o mércores 19 e o mércores 26. Aquí está toda a información ao respecto.
Ao longo deste mes se anunciarán tamén os traballos premiados do Ben Veñas, Maio, non nos perdades de vista!
A partir do sábado 15 de maio comezamos a procurar o rastro das mouras da man de Ab Origine e Polo correo do vento. Familias de todas as parroquias de Pontevedra, acompañádenos na nosa procura! Podedes ver toda a información aquí inscribirvos a través deste formulario.
Para celebrar o Día das Letras Galegas imos ter un acto moi especial: X Xela. Esta semana contarémosvos máis!
Pechamos o mes por todo o alto co Galegote Rock. Queredes saber que grupos actuarán este ano? Pois non nos perdades de vista!
Maio, Mes da Lingua é un programa impulsado pola da Concellaría de Normalización Lingüística do Concello de Pontevedra para facer visible o traballo a prol da lingua que se fai tanto desde o Concello como desde diversas entidades do municipio, principalmente desde asociacións. Así, nun programa conxunto editado en papel e en formato electrónico recóllense todas as actividades que teñen lugar no concello nas que a lingua é vehículo ou protagonista: conferencias, xornadas, relatorios, camiñadas, recitais, certames e premios, cine e teatro… O traballo para a recuperación e a normalización do uso da lingua desenvólvese ao longo de todo o ano, pero neste mes increméntase especialmente para reivindicar que o Día das Letras Galegas, non é abondo para o traballo a prol da idioma. Maio, Mes da Lingua quere mostrar que hai moita vida arredor do galego e que, como dicía Manuel María “o idioma é a chave coa que abrimos o mundo”.
Maio, Mes da Lingua é unha iniciativa que xorde cos seguintes propósitos:
- Promover o uso da lingua en distintos ámbitos sociais
- Visibilizar o traballo de asociacións e outras entidades a prol da lingua
- Animar a novas asociacións a unirse no traballo pola lingua
- Agrupar toda a actividade que hai arredor da lingua no mes de maio nun mesmo punto de referencia, a través dun programa en formato físico e dixital.
- Valorar a lingua como patrimonio de todas e de todos dun xeito lúdico e formativo.
- Propiciar a reflexión sobre a situación da lingua e a importancia de activar as accións sociais e individuais a prol dela.
- Contribuír a manter vivo o maior patrimonio creado polas galegas e os galegos e implicar a toda a poboación pontevedresa no cumprimento deste obxectivo.
