Convertido nunha referencia inamovíbel dentro das actividades de Normalización lingüística, repartirá 3.750 euros en premios e fixa o seu gran día para o sábado 10 de maio.
Xa está en marcha un nova edición do Ben Veñas, Maio. Dentro das actividades promovidas e realizadas pola área de Normalización lingüística do Concello de Pontevedra, o certame Ben Veñas Maio aparece como unha entidade con nome de seu. Trátase dun certame dirixido ao alumnado dos centros públicos de secundaria, bacharelato e ciclos formativos do municipio que leva máis de dúas décadas promovendo o uso do galego entre a mocidade no eido da expresión artística e cultural.
O Concello de Pontevedra repartirá un total de 3.750 euros nesta edición a través das distintas categorías que integran o Ben Veñas, Maio. O prazo para presentar os traballos rematará o 20 de abril e a entrega de premios, así como a celebración do clásico certame musical, acontecerá o vindeiro 10 de maio, no auditorio do Pazo da Cultura. Compre lembrar e sinalar que esta actividade ten a súa orixe nos Equipos de Normalización e Dinamización Lingüística dos centros públicos de ensino secundario do concello.
O Ben Veñas Maio estará composto neste 2025 polos mesmos certames ou categorías que se veñen facendo ao longo dos últimos anos, destacando a de Tik-Tok, xa completamente establecida dentro do programa. Así, a continuación aparecen os distintos certames:
- IV Certame de Vídeos de Tik Tok e Reels de Instagram Ben Veñas, Maio
- XXIV Certame Musical Ben Veñas, Maio
- IX Certame de Curtametraxes Ben Veñas, Maio
- XXIV Certame de Fotografía Ben Veñas, Maio
- XXXII Certame de Banda Deseñada Ben Veñas, Maio
- XXXII Certame de Narración Curta Ben Veñas, Maio
- XXIV Certame de Poesía Ben Veñas, Maio
As bases completas para participar e os distintos formularios de inscrición están dispoñibles aquí.
