Prometía ser unha edición de “puro magnetismo” e non decepcionou. O Enreguéifate 2025 pechou inscricións cun total de 96 vídeos recibidos, con participantes procedentes de máis dunha vintena de concellos galegos. Unha cifra de récord que confirma a boa saúde da regueifa e da improvisación oral.
Como en edicións anteriores, o certame impulsado polos servizos de normalización dos concellos de Ames, Carballo, Pontevedra, Santiago de Compostela e Teo contou con dúas categorías: unha xeral e outra escolar. Nesta ocasión, eran oito os premios que se repartían en cada unha delas: á regueifa máis brava, á máis aguda, á máis diversa, á máis reivindicativa, á mellor cantada, á mellor falada, á máis inclusiva e á máis entroideira.
Dous dous premios foron para centros escolares do concello de Pontevedra. O premio á regueifa máis entroideira na categoría escolar foi para o CEIP de San Martiño, con O Entroido galego. Na categoría xeral, a comunidade educativa do IES Luís Seoane levou o premio á regueifa máis reivindicativa con Se nós fósemos ministras.
O xurado estivo composto por Manolo Maseda, mestre, músico e regueifeiro; Séchu Sende, mestre, escritor e regueifeiro; Bea Vilaverde, técnica do Departamento de Lingua do Concello de Santiago de Compostela; e Lucía Ferro, técnica do Servizo de Normalización Lingüística do Concello de Ames.
O 19 de maio, ás 11:30 horas, terá lugar a entrega de premios nunha gala no Auditorio de Galicia, en Santiago de Compostela. O evento será ademais unha celebración conxunta co Regueibertso, un programa apoiado pola Deputación da Coruña que procura a sensibilización lingüística e a difusión da regueifa e o bertsolarismo entre a xente nova. Xurdido en 2016 dentro do Proxecto Regueifesta, colectivo educativo da Asociación ORAL, o Regueibertso consiste nun intercambio entre alumnado improvisador de Galicia e do País Vasco. Este ano, a convivencia entre escolares regueifeiras e bertsolaris terá lugar en Santiago de Compostela durante a fin de semana das Letras Galegas e concluirá coa participación da rapazada na gala do Enreguéifate – Regueibertso.
Estes son os vídeos gañadores, que poden verse no web do certame ou na canle de Youtube:
CATEGORÍA XERAL
A máis brava
PACO FELÍPEZ E ÓSCAR GARCÍA, con Veciños ben levados (Carballo e Malpica)
A máis aguda
ARRIEIRO E CHAMINHO, con Vídeo-regueifa Atlántica (Malpica e A Coruña)
A máis diversa
ESCOLA DA REGUEIFA DE CARBALLO, con A nosa propia melodía (Carballo)
A máis reivindicativa
MINISTRAS, con Se nós fósemos ministras (Pontevedra)
A mellor cantada
ASOCIACIÓN CULTURAL CORO VIRXE DA RENDA, con Cantar e desfrutar (Poio)
A mellor falada (ex aequo)
GUERREIRAS REGUEIFEIRAS, con Cidades galegas (Santiago de Compostela)
IRIA E JAVI, con Vivan as nosas poetas (Santiago de Compostela)
A máis inclusiva
TEISEIROS REGUEIFEIROS, con Non hai quen viva! Regueifa do alugueiro (Centro de Inclusión Fundación da Santa Cruz en Vigo)
A máis entroideira
Premio deserto
CATEGORÍA ESCOLAR
A máis brava
OS FALABARATO
CEIP Plurilingüe de Nétoma-Razo (Carballo)
A máis aguda
REGUEIFA DO BANQUETE
CEIP Plurilingüe Cardeal Quiroga Palacios (Santiago de Compostela)
A máis diversa
REGUEIFA POLA DIVERSIDADE
IES Pluringüe Rosalía de Castro (Santiago de Compostela)
A máis reivindicativa
ALTRI NON! MINA NON!
IES Marco do Camballón (Vila de Cruces)
A mellor cantada
EMOCIÓN OU RAZÓN?
CPI Eusebio Lorenzo Baleirón Tarrío (Dodro)
A mellor falada
CONTINUEMOS CO LEGADO
CPI As Revoltas (Cabana de Bergantiños)
A máis inclusiva
SOMOS DIFERENTES, SOMOS REFERENTES!
IES do Milladoiro e Cee Manuel Navalón (Ames e Santiago de Compostela)
A máis entroideira
O ENTROIDO GALEGO
CEIP San Martiño (Pontevedra)
