CantáMOLA en galego

Durante o mes de maio estivo exposta para a cidadanía na praza de Ourense de Pontevedra a exposición “CantáMOLA en galego”, unha exposición transmedia que celebra a revolución musical no século XXI en Galicia. Despois de pasar polas rúas de Pontevedra e polo Culturgal, a partir de setembro adoptará formato itinerante para achegarse a centros de ensino, centros sociais e mesmo a outros concellos.

A música cantada é unha ferramenta fundamental para vivirmos en galego, mais tamén para enriquecer a lingua que usamos ou até para achegarnos a ela e empezar a aprender. Ademais, un dos indicadores da vitalidade dunha lingua é a súa utilidade como expresión da creatividade; consonte isto a lingua galega está moi presente tanto nas creacións que se fan en Pontevedra como nas que se fan no noso país. A música en galego tamén gusta e atopa público alén das nosas fronteiras porque, de todas as artes, quizais a música sexa a linguaxe máis universal. Porén, non é doado atopar canles onde termos unha panorámica completa que nos permita coñecer e escoller, cando en galego hai música de diferentes estilos e ritmos,  para todos os gustos. 

Por todo isto, o Concello de Pontevedra desde Normalización Lingüística puxo en marcha a primeira exposición que percorre o panorama musical en galego dentro e fóra de Pontevedra nas dúas primeiras décadas deste século. Con formato multimedia, a mostra busca conectar a inmensa variedade de estilos musicais con cadanseu público, especialmente co mozo. Para iso, creáronse vinte e dous paneis con información visual e gráfica, listaxes de reprodución en Spotify e Youtube, unha unidade didáctica dirixida ao ensino secundario e un catálogo; estes dous últimos están na Rede para descarga libre, pódese acceder aquí, e mais editados en papel. Coidouse o deseño, a exquisita selección de contidos e os formatos escollidos: lonas de doada montaxe e transporte para espazos pechados e un lucido formato xigante para espazos grandes e para a rúa.

Panel 1. INTRODUCIÓN. Co século XXI e a chegada de Internet e as facilidades de gravación e difusión, a música cantada en galega abriuse a estilos musicais que antes non empregaba.

Panel 2. SER UNHA MESMA – CANCIÓN DE AUTORÍA. Propostas onde o selo de seu, onde a figura da vocalista-compositora é máis protagonista.

Paneis 3 e 4. POP-ROCK. Dentro do pop-rock as bandas son moitas; unhas máis orixinais ou alternativas e outras máis clásicas, pero todas enchidas da electricidade das guitarras, o baixo e a batería marcando o ritmo …

Panel 5. MÚSICAS URBANAS, ELECTRÓNICA, EXPERIMENTACIÓN. Sons argallados coas posibilidades das computadoras, sintetizadores e outros trebellos.

Panel 6. RAP / HIP HOP. Se pensamos na palabra, en mensaxes e discursos con rima, en retórica, coincidiremos en que o rap é o recurso estilístico por excelencia. En galego tamén.

Paneis 7 e 8. Máis TRADI… ou menos TRADI. Con artistas ás veces máis fieis á tradición e outras a darlle unha volta, o noso país é referente en música tradicional, de seu, propia.

Panel 9. SE ISTO NON SE AMAÑA, CAÑA, CAÑA, CAÑA. Letras con compromiso político e crítica social unida ao punk, rock duro, metal, heavy…

Panel 10. MESTIZAXE / RITMOS DO MUNDO. Os máis habituais pop e rock fúndense con ritmos xurdidos noutras parte do mundo: ska, funk, disco, cumbia, reggae, kletzmer…

Panel 11. INFANTIL E FAMILIAR. Un feixe de proxectos para cantarmos letras divertidas e sensíbeis en familia sen descoidar a calidade e diversidade musical.

Panel 12. XUNTAS e REVOLTAS. E HUMOR. Os discos recompilatorios e tributos son outra fonte de cancións en galego e o humor tamén está presente en varias propostas.

Panel 13. SINGULARES / ÁS VECES. Non podemos esquecer traballos punctuais ou particulares e as artistas que de cando en vez gravan na nosa lingua.

Panel 14. CONCLUSIÓN E RECURSOS. Animámoste a consumir máis música en galego e propoñemos lugares de encontro para atopala.

Paneis Pontevedra. Directorio de recursos da administración local (de formación e de práctica) a disposición da cidadanía e sumario dos eventos culturais (de iniciativa pública e privada) máis importantes que se celebran no municipio e que teñen na música popular contemporánea un dos seus eixos.

Esta exposición foi galardoada nos Premios Mil Primaveras ao mellor proxecto novo 2021.