Youtubeiras é un proxecto que nace co obxectivo de incrementar a presenza do galego na Rede. A través de diferentes liñas de acción, promove e visibiliza o uso do galego a través da rede social de vídeos máis grande do mercado dixital, YouTube, con vídeos de opinión, videotitoriais, canles e creación musical. Este proxecto pretende fomentar a creatividade con temas propios e xerar referentes en galego dun novo axente con gran repercusión e impacto social como son as youtubeiras e youtubeiros.
Youtubeiras chega á sétima edición no 2023 para incentivar, consolidar, difundir e fortalecer a creación de vídeos en galego no YouTube. Baixo o lema Rede aberta, rede diversa!, esta nova edición pon o foco sobre a diversidade da comunidade de persoas creadoras en galego, en constante crecemento e capaz de abranguer nas súas canles todas as temáticas en calquera formato.
Como cada ano, convócanse de novo os Premios Youtubeiras cunha contía de 7500 euros repartidos entre oito categorías.