Falamos

Queres facer cousas divertidas e
coñecer xente en galego?

Queres descubrir un mundo enteiro que está a agardar por ti?

Atréveste a lanzarte a falar máis galego?; e a falalo mellor?

Se estudas no campus de Pontevedra, esta proposta é para ti e contigo. Queremos artellar actividades para e coa mocidade do campus de Pontevedra para socializar, facer amizades, aprender, divertise… en galego.
Puxémola en marcha a Universidade de Vigo e mais o Concello de Pontevedra porque cremos que a potencia da nosa lingua vai máis alá de ser un simple instrumento de comunicación. Queres sumarte á comunidade?

INSCRÍBETE AQUÍ

PARTICIPA!

Durante este curso vai haber unha chea de actividades, a única condición para participar é falar en galego! Inscríbete no formulario premendo aquí e manterémoste informado/a!

TES PROPOSTAS?

Ademais de inscribirte e participar nas actividades, se tes dúbidas ou queres facernos chegar as túas propostas, podes usar este formulario de contacto.

ACTIVIDADES

Para participar nas actividades é preciso:

Formar parte do programa Falamos; podes solicitar a inscrición en https://apuntate.pontevedra.gal/falamos/
Apuntarte nas actividades no prazo de inscrición: https://apuntate.pontevedra.gal/falamos/. As prazas cóbrense por orde de inscrición e o prazo para apuntarse xa comezou.
Antes do comezo das actividades porémonos en contacto contigo para indicarche se tes ou non praza e, de tela, convocándote á primeira sesión.

Onde e cando

Toda a información práctica das actividades publicarase proximamente.

VOLUNTARIADO

Queres coñecer xente e gústache darlle á lingua? Esta actividade é para ti, tanto se es falante excelente como se tes a sensación de que che falta fluidez. Apúntate, que a falar apréndese falando!

Inicio dos grupos de conversa a principios de novembro. Porémosvos en contacto proximamente. As citas marcarédelas segundo a vosa dispoñibilidade, recomendamos que sexan semanais. Os grupos máis activos recibirán recompensas.

TEATRO

Esta actividade serviravos para falar a eito e mais para desenvolver habilidades expresivas, creativas e artísticas. Nesta actividade traballarase a improvisación e iredes expresando e creando de xeito colectivo, con enfoque diverso.

Actividade SEMANAL. Mércores de 18.30 a 20.30 h na Casa Azul (aquí).

Inicio: 13 de outubro. Prazas limitadas por orde de solicitude.

CLUB DE COCIÑA

Se che gusta a cociña, esta é a túa actividade! Nela aprenderás algúns segredos sobre salsas, petiscos, chocolate e moitas larpeiradas máis, doces e salgadas. Ademais, poderás darlle á lingua!

Datas das sesións: 19 e 26 de outubro; 9, 23 e 30 de novembro e 14 de decembro.

Horario: Martes de 19.30 a 21 h na sala Valdecorvos da Casa Azul (aquí).

Prazas limitadas por orde de solicitude.

CLUB DE LECTURA

Propoñémosche un espazo para compartir e debater en galego lecturas de textos literarios escritos ou traducidos á nosa lingua. Alternaranse estas sesións con outras de creación literaria. A merca dos libros contará cunha bonificación, sempre que se realice nas librerías colaboradoras.

Datas das sesións: 18 e 25 de outubro; 8, 22 de novembro e 13 de decembro.

Horario: luns de 19 a 20.30 h na Casa das Campás (aquí).

Prazas limitadas por orde de solicitude.